சுகம் சுகம் சுகம் ....

காலை வேளையில்
கண்விழித்து தூங்கினால்
காண்பது – ஓர் சுகம்

காதல் கொண்ட பெண்ணின்
கண்களை கண்நோக்கினால்
காண்பது - ஓர் சுகம் காவல் இருந்து
கண் கவர்ந்தவளை
காண்பதில் - ஓர் சுகம்

காட்சி கண்ட முனிவன்
கண் திறந்து உலகை
காண்பதில் - ஓர் சுகம்

மங்கை மனம்
மனங்கவர்ந்தவனை ரகசியமாய்
மனதுள் ரசிப்பதில் - ஓர் சுகம்

பத்து மாதம் சுமந்தவளுக்கு
பச்சிளம் குழந்தையின்
பல்லில்லா சிரிப்பு – ஓர் சுகம்

பகலில் வேலை செய்து
பழம் சோறு உண்டால்
பாற்கடல் அமுதம் உண்ட சுகம்

பனியில் முழ்கிய றோஜா
பச்சை பசேல் என்ற புல்வெளி
பார்பதில் - ஓர் சுகம்


பக்கத்து வீட்டு மாங்காயை
பட்டபகலில் திருட்டாய்
பறிப்பதில் - ஓர் சுகம்

தென்னை இளநீரும்
தென்றல் இளம் காற்றும்
தெவிட்டாத – ஓர் சுகம்

படித்ததெல்லாம்
பரீட்சைக்கு வந்தால் காணும்
பரவசத்தில் - ஓர் சுகம்

கண்களில் சிறைபிடித்து
கவிதையாய் அதை வடித்து
காண்பதில் - ஓர் சுகம்

மனம் விரும்பும் பாடலை
மனம் கேட்கும் நேரத்தில்
மனம் விட்டு பாடுவதில் - ஓர் சுகம்

சிலையை வடிக்கும் கையும்
சிலையாகும் கல்லும்
சிந்தித்தால் - ஓர் சுகம்

அலை கொண்ட கடலில்
ஆழக் கால் புதைய நடந்து
அலைவதில் - ஓர் சுகம்



மாலை நேர வானத்தின்
மனம் கவர் வர்ணஜாலத்தை
மணலில் இருந்து ரசிப்பது – ஓர் சுகம்

நீலநிறத்தோன் விழிகளும்
நீண்டு வளர்ந்த கதைகளும்
நினைப்பதே – ஓர் சுகம்

என்றும் புன்னகைக்கும் முகம்
எதிலும் நன்மையைக்காணும் மனம்
எப்பொழுதும் காண்பது சுகம் சுகம் சுகம்